Lunes, Agosto 25, 2014

Luisitanaga

Asukarera

Yaong pinangyarihan
Krimeng karumaldumal
Tunghayan mo sa Tarlac
Pabrika ng asukal

Agosto 2014 | ©Piping Walang Kamay

Martes, Marso 11, 2014

Cordillera



ang mga halaman dito
at damo at puno
parang mga batang naglalaro

hindi magkandatuto
kung paano
babatiin akong estranghero
na manghang-mangha
sa kagandahan ng kanilang anyo
na pinatingkad ng mga puno ng Pino

akala mo may mga facebook
at tumblr at twitter
hindi magkamayaw sa pagharap sa akin
na tila baga maingay na sinasabing
sa internet kapag aking ipinaskil
ang kanilang mga larawan
pag-tag sa kanila huwag na huwag kong kalimutan

hindi ko lamang masambit
sa mga puno ng saleng
at ang mga halamang nakalimutan kong kilalanin
nalimot ko ang camera na dalhin

ngunit sisikapin ko pa rin
iguhit ang kagandahang kanilang angkin

ang tikas ng kabundukang kanila man din
at karga-karga silang maririkit

subalit pilit sinisira nitong pagmimina
at pagpuputol ng mga puno
sinisikap sirain ng mga nasa gobyerno
at mga kapitalistang napakaganid sa tubo

sisikapin kong iguhit ang kanilang ganda
gamit ang mga kataga
batid kong hindi lang nila nais makita
ng karamihan ang kagandahan mayroon sila
kundi ang hiyaw ng tahimik nilang protesta

sisikapin kong bigyang hustisya
ang kanilang mga panawagan

pero sa susunod hindi ko na kakalimutan
na dalhin ang camera upang kunan sila ng larawan


"Cordillera" | Piping Walang Kamay | ©2014

Ang larawan ay mula kay Arthur L. Allad-iw, Northern Dispatch